点击标题下「佛山老人宝」可快速关注
粤语歌坛最重要的两位大人物，歌神许冠杰和词曲家黄霑，原来都是广州西关人，睇来西关少爷并非浪得虚名。
许冠杰《打雀英雄传》
佢，系粤语流行歌嘅鼻祖！
佢，系香港乐坛第一代歌神！
好多人可能唔知，原来歌神许冠杰仲系一个老广，佢1948年9月6日出生喺西关嘅多宝路，两岁时先至随同屋企人到香港定居。
喺上世纪六七十年代嘅香港，音乐系有分三六九等，老一辈嘅人自然系听粤曲，是为最高雅；而三四十年代就开始盛行嘅国语歌同样延续到果一代人嘅听歌主流习惯；年轻一代受英国殖民文化影响，纷纷以追逐西方英文歌为新潮，会唱一口流利英文歌嘅人自然都会被睇高一线；而最为不济嘅，就系本地嘅粤语流行歌啦，视为较低俗嘅音乐。
1971年毕业于香港大学嘅许冠杰，反而不避通俗，以粤语唱出多首反映社会现况、讽刺时弊嘅流行歌曲。作品大获大众认可与好评。之后粤语流行歌先至喺香港乐坛如雨后春笋。所以粤语流行歌嘅潮流，可以话系由佢开创。
许冠杰嘅歌题材广泛，由描述打工仔嘅无奈，到打麻雀嘅心情，亦不乏爱情同励志歌曲，当中唔少更系由佢亲自填词及作曲，呢啲系其他歌手都少有嘅。其歌曲嘅社会影响以及所折射嘅哲学，广受文化界重视同讨论。
许冠杰喺香港流行乐坛拥有非常崇高嘅地位，得到多位巨星嘅尊重及认同，包括罗文、甄妮、徐小凤、谭咏麟、张国荣、梅艳芳、张学友、陈百强等。 张学友曾被封为「第二代歌神」，但佢表示许冠杰系唯一嘅歌神：「因为许冠杰系广东流行曲嘅开创者，佢嘅影响力系历史性嘅，我真系唔及得佢。」
《半斤八两》
打工仔有及辛酸，几咁惨惨猪，第一句歌词就话咗俾你知「我哋呢班打工仔 一生一世为钱币 做奴隶，个种辛苦折堕讲出吓鬼 死俾你睇～」
《浪子心声》
「难分真与假，人面多险诈」一语道出所有浪子嘅心声～
《天才白痴梦》
一句「天造之材 皆有其用 振翅高飞 何必在梦中」当年不知鼓舞咗几多郁郁不得志嘅人～
《打雀英雄传》
广东人，我哋最钟意打嘅系麻雀，唔系麻将，有雀打，最开心「六婶 三太公 大众开枱呀面似莲蓉 又放工 打餐懵 围埋砌几圈呀论呀论英雄～」
《天才与白痴》
有人话过，上帝系公平的，咁你呢「呢个世界上 有精仔 有懵仔 有叻仔 散仔 赌仔 仲有戆居仔～」
《学生哥》
读书嘅时候，你有无拍拖？有无肥佬咗？「学生哥 咪书咯 咪日夜挂住拍拖～顾住十几科 科科喎 面懵懵一肚火～」
《十个女仔》
N年前，Sam歌就已经睇穿晒而家啲港女啦「十个女仔九个认细 明明系老佢话唔系 三张几嘢扎起辫仔 青春美丽就冇失礼 十个女仔九个浪费 时时换季已系成例～」
《锡晒你》
沟到女，咪要冧女咯，唔冧女，小心佢嬲猪你呀「锡晒你 你乖乖地我实行锡晒妳 俩家都拖到实只手指尾 上去天棚放飞机～」
《财神到》
年年春节必播必听嘅歌，你今年过年，必唱作未呀？「财神到 财神到 好心得好报 财神话 财神话 搵钱依正路 财神到 财神到 好走快两步 得到佢睇起你 你有前途！」
讲起Sam哥嘅好歌、经典歌，真系仲有好多好多！
咁你，你阿爸你阿妈，最钟意Sam哥边首歌？喺评论度讲下咯！
综合：金句王
特别声明：以上内容(如有图片或视频亦包括在内)为自媒体平台“网易号”用户上传并发布，本平台仅提供信息存储服务。
Notice: The content above (including the pictures and videos if any) is uploaded and posted by a user of NetEase Hao, which is a social media platform and only provides information storage services.
