為食推介丨紅足十幾年的「寶藏甜品店」，解鎖秋天第一口甜！

哩個星期大家終於喺澳門

感受到一絲“秋的氣息”

氣溫驟降dry到爆炸

身邊嘅朋友都大嗌

“乾到有少少喉嚨痛”

為食妹迫不及待咁要潤潤佢

跟住我一齊嚟解鎖秋天第一口甜

PART 1.

親民實惠，相伴街坊廿載

秋天係一個嗜甜嘅季節，同甜品就再適配不過了！老粉就一定知道，為食妹至鐘意去三盞燈嗰頭搵食，今日就帶大家嚟老地方嘅寶藏小店甜一甜~

店仔細細，但無論咩時候嚟都圍滿曬人，老闆娘做到踢曬腳。為食妹下晝兩點過嚟排隊，都買唔到心心念念嘅南瓜豆腐花同紫薯豆腐花。

哩間壓箱底嘅寶藏小店，開咗成廿年人氣有增無減。全賴選擇繁多、出品穩定、價格實惠，做嘅都係街坊生意，大家經過嘅時候總係忍不住過嚟幫襯下。

PART 2.

進店必買，人氣豆花豆漿

哩度最令我忘不了情嘅就係豆腐花同豆漿，每次嚟都必須買翻杯嘬一嘬。話不多說，快快脆帶大家入戲肉！

01

【喳喳豆腐花】

點一份喳喳豆腐花，將兩種經典甜品捧喺手上，哩份甜蜜嘅滋味超級加倍~豆腐花豆香味濃，細滑甘甜，而喳喳就帶嚟咗豐富嘅咀嚼感。

聽老闆娘講，雖然一杯只係十蚊雞出頭，但係一直都堅持用加拿大進口黃豆現磨，十幾年都保持初心，賺少啲食好啲大家都開心啲~

02

【西米豆腐花】

廣東人講究養生，用薑汁溫和中和豆腐花嘅寒氣，薑汁唔會太濃郁辣喉，甜度恰到好處。於是哩杯薑汁豆腐花俘虜為食妹。

咁正嘅豆腐花拼埋西米，直情就係錦上添花。煙煙韌韌嘅西米組合埋滑溜溜嘅豆腐花，簡直夠曬煞食，一杯都唔夠喉！

03

【純磨豆漿&純磨黑豆漿】

純磨豆漿都係哩度嘅特色之一，以前最中意就係一大早嚟埋翻支餸早餐~每日新鮮純磨，非常之香濃，豆香十足！除咗標配嘅黑白豆漿，仲有黑芝麻、紫米等更營養嘅搭配！

PART 3.

一甜知秋，傳統廣式甜品

01

【薑汁涼粉】

“唔該，再要一碗加奶薑汁涼粉啊，碗裝嘅~”

黝黑黑涼粉淋上薑汁同煉奶，帶嚟咗死死甜蜜，中和黑涼粉嘅微甘。食落清爽，最緊要佢清熱！又可以選擇用杯裝，一路行街一路飲！

02

【黃糖糕&白糖糕】

“上邊蒸鬆糕，下邊涼粉草”就最適合形容依家嘅天氣，無鬆糕就用糖糕頂住檔先，都叫集齊鬆糕同涼粉哩對CP。

黃白糖糕都非常清甜彈牙，黃糖糕嘅糖味會更馥郁，而白糖糕嘅米味就更濃郁。點揀就睇你好邊口，而我“全都要”！

03

【芝麻糊】

成日甩頭髮嘅媒體工作者本人必食經典芝麻糊，希望食咗哩碗嫩滑嘅芝麻糊，都可以生翻啲黑卒卒嘅秀髮。不過為食妹就覺得有少少偏甜，落少啲糖就perfect啦~

04

【芝麻卷】

食完芝麻糊再嚟一份芝麻卷，直頭十全大補咁款！滿漢全席之一嘅芝麻卷，做法傳統有風味，未咬都睇得出佢夠Q彈~

05

【雞骨草&鮮榨蔗汁】

最近大家都喺網上打趣咁調侃，天氣一凍廣東人就開始喉嚨痛。咁喺時候整翻支下火涼茶，斑痧太金，雞骨草同蔗汁就岩岩好，大家都好接受啲~

· 今日作者 ·

[ 圖文 · 頗醬醬 ]

[ 攝影 · COISINI ]

00：19/09：26

點分享

點收藏

點點讚

點在看